தமிழ் சினிமா அப்டேட்ஸ் களை உடனுக்குடன் தெரிந்து கொள்ள Filmi Street App - ஐ டவுன்லோட் செய்யுங்கள்
நடிகர்கள் : உதயநிதி, மஞ்சிமாமோகன், சூரி, ஆர்கே. சுரேஷ், டேனியல் பாலாஜி, ராதிகா, கௌரவ், ரோகினி மற்றும் பலர்.
இயக்கம் : கௌரவ்
இசை : இமான்
ஒளிப்பதிவு: ரிச்சர்ட் எம் நாதன்
எடிட்டிங்: பிரவீன் கே.எல்
பி.ஆர்.ஓ. : நிகில்
தயாரிப்பு: லைக்கா நிறுவனம்
கதைக்களம்…
டெல்லி மற்றும் மும்பையில் குண்டு வெடிக்கிறது. இதற்கு இரு அமைப்பினர் பொறுப்பு ஏற்றாலும், இது போன்ற குண்டுகளை தயாரிப்பவன் சோட்டா (டேனியல் பாலாஜி) என்பது தெரிய வருகிறது.
இவனை சிறையிலும் அடைக்கின்றனர். ஆனால் அங்கும் குண்டு வெடிக்க செய்து, அடுத்த புரொஜக்டை செயல்படுத்த சிறையிலிருந்து தப்பிக்கிறார்.
அப்போது எதிர்பாராவிதமாக உதயநிதியின் காரில் டேனியல் மோத, அவர் தீவிரவாதி என தெரியாமல் உதவி செய்கிறார் உதயநிதி.
அதன்பின்னர் அங்கிருந்து தப்பும் டேனியல் டப்பிங் கலைஞரான சூரியின் பைக்கில் லிப்ட் கேட்கிறார். அவரும் உதவுகிறார்.
பின்னர் போலீஸ் விசாரணையில் உதயநிதியும் சூரியும் தீவிரவாதிக்கு உதவியது தெரிய வருகிறது.
இதனால் அவர்களை கைது செய்ய, அவர்கள் இருவரும் தாங்கள் நிரபராதிகள் என நிரூபிக்க போராடும் போராட்டமே இப்படை வெல்லும்.
கேரக்டர்கள்…
உதயநிதியை உச்சத்திற்கு கொண்டு செல்லும் படம் இது. கிடைத்த வாய்ப்பை நன்றாக பயன்படுத்தியிருக்கிறார்.
அவரது டிரெஸ் கலர் முதல் டான்ஸ் வரை கவனம் செலுத்தி நடித்திருக்கிறார்.
ஆக்ரோஷமாக பைட் செய்யாமல் பிரிலியன்ட்டாக பைட் செய்து ஸ்கோர் செய்கிறார்.
இடைவேளை சமயத்தில்தான் உதயநிதியுடன் சூரி இணைகிறார். அதிலிருந்து கதைக்கு தேவையான காமெடியை மிகையில்லாமல் கொடுத்திருக்கிறார்கள்.
வெறும் டூயட் பாட மட்டுமில்லாமல் கதைக்கு ஏற்ற நாயகி நான் என மஞ்சிமா நடிப்பை வழங்கியிருக்கிறார்.
டேனியல் பாலாஜிக்கு ஆரம்ப காட்சியில் அசத்தல் அறிமுகம். அதனை தொடர்ந்து சைலண்டாக ஸ்கெட்ச் போடுவது செம.
அதிரடி போலீஸ் ஆக ஆர்.கே.சுரேஷ். தங்கை பாசம், கடமை என இரண்டிலும் கம்பீரமாக நிற்கிறார்.
சிங்கம் ஸ்டைல் மீசையில் மிடுக்காக வருகிறார் இயக்குனர் கௌரவ் நாராயணன்.
ஸ்ரீமன் சில காட்சிகளில் வந்தாலும் காமெடியால் சிரிக்க வைக்கிறார்.
சூரியின் மனைவியாக வரும் ரோகினி அனுதாபம் பட வைக்கிறார்.
பஸ் டிரைவராக ராதிகா சரத்குமாரின் பங்கும் சிறப்பாக இருக்கிறது.
இவர்களைத் தவிர டேனியல் பாலாஜியின் ஆட்களாக வரும் அந்த பெண் உட்பட அனைவரும் கச்சிதம்.
இப்படி எல்லா கேரக்டரையும் ரசிக்கும்படி செய்திருக்கிறார் இயக்குனர்.
தொழில்நுட்ப கலைஞர்கள்…
இமான் இசையில் குலேபா பாடலும் அந்த பாரீன் காட்சிகளும் ரசிக்க வைக்கிறது.
லோக்கேசன் தேர்வு செய்த இயக்குனர் மற்றும் அவரது உதவியாளர் சந்துரு அவர்களை எவ்வளவு வேண்டுமானாலும் பாராட்டலாம்.
ரிச்சர்ட் எம் நாதனின் ஒளிப்பதிவு அப்ளாஸை அள்ளும்.
குறிப்பாக டாப் ஆங்கிள் காட்சிகள், ஒரு காட்சிக்கும் மற்ற காட்சிக்கும் தொடர்பு படுத்தும் சிக்னல்கள் காட்சிகள், என அனைத்தும் அருமை.
எடிட்டர் பிரவீன் படத்தை விறுவிறுப்பாக பெரிதும் உதவியிருக்கிறார்.
இயக்கம் பற்றிய அலசல்…
இயக்குனர் கௌரவ் படம் என்றால் குடும்பத்துடன் பார்க்கும் வகையில் இருக்கும். அதை இதிலும் நிரூபித்து இருக்கிறார்.
வில்லன் சென்னையில் நுழையும்போது, ஒரு கருந்தேள் சென்னை எல்லையில் வருவது ரசிக்க வைக்கிறது.
ராதிகா ஏன் பஸ் ஓட்டுனராக ஆனார்? என அதை ஒரு பாடலில் சொன்ன விதம் என அனைத்தும் அருமை.
குலேபா பாடலில் மஞ்சிமாவும் அந்த பாவடையும் தியேட்டரிலேயே நம்மை அமர வைக்கிறது.
இமெயில் அனுப்பினால் ஐபி அட்ரஸ் கண்டுபிடிக்கப்படும் என்பதால் அதை டிராப்ஃட்டில் சேர்த்து வைப்பது, என தீவிரவாதிகள் ஸ்கெட்ச் போடுவது கைத்தட்ட வைக்கிறது.
மேலும் சூரியை டப்பிங் ஆர்ஸ்ட்டிக்காக நடிக்க வைத்து, அவருக்கு நினைவு திரும்பிய உடன் நான் தீவிரவாதிக்கெல்லாம் தீவிரவாதி என பேச வைத்திருப்பது என சின்ன சின்ன விஷயங்களில் எல்லாம் படத்தை பேச வைக்கிறார் இயக்குனர்.
படத்தின் வசனங்களை ரசிக்கும்படி கொடுத்திருக்கிறார்.
இப்படை வெல்லும்… இப்படம் தோற்கின் எப்படம் வெல்லும்?