லக்ஷ்மி விமர்சனம்

லக்ஷ்மி விமர்சனம்

Casting : Prabhu Deva, Ditya Bhande, Aishwarya Rajesh

Directed By : Vijay

Music By : Sam C. S.

Produced By : Prateek Chakravorty, Shruti Nallappa, R. Ravindran

கதைக்களம்..

படித்தால், நடந்தால், சிரித்தால், கனவு கண்டால், படுத்தால்.. இப்படி எந்நேரமும் டான்ஸை பற்றியே சிந்திப்பவள் தித்யா. இவர்தான் இந்த படத்தில் லக்‌ஷ்மி யாக நடித்திருக்கிறார். இவருக்கு அப்பா கிடையாது.

ஆனால் இவரது அம்மா ஐஸ்வர்யா ராஜேஷ்க்கோ நடனம் என்றாலே பிடிக்காது.

எனவே அம்மாவுக்கு தெரியாமல் நடனம் கற்றுக் கொண்டு மேடையேற நினைக்கிறார்.

அதன்படி காபி ஷாப் வைத்திருக்கும் பிரபுதேவாவின் உதவியை நாடுகிறார். அவரும் இவருக்கு உதவுகிறார்.

ஒருவழியாக அம்மா முதல் பள்ளி ஆசிரியர்களை ஏமாற்றி நடனம் கற்றுக் கொண்டு மும்பையில் நடைபெறும் ப்ரைட் ஆப் இந்தியா டான்ஸ் போட்டியில் பங்கேற்கிறார்.

ஆனால் அங்குள்ள லைட்டிங் வெளிச்சத்தில் நடனம் ஆட முடியாமல் லக்ஷ்மி சொதப்பி விடுகிறார்.

இதனால் இவருடைய சென்னை அணியே வெளியேற வேண்டிய சூழ்நிலை ஏற்படுகிறது.

அப்போது அவரை சேர்க்க சொல்லி மீண்டும் வாய்ப்பளிக்க வேண்டும் என கேட்டு வருகிறார் பிரபுதேவா.

அவர் சொன்ன உடன் அந்த நடுவர் குழுவே கேட்கிறது. அப்படி என்றால், பிரபுதேவா யார்? அவர் சொன்னால் அவர்கள் கேட்பது ஏன்? இந்த லக்‌ஷ்மி மீது பிரபுதேவாவுக்கு அப்படி என்ன அக்கறை..? என்பதே மீதிக்கதை.

இறுதியில் நடன போட்டியில் பரிசை வென்றாரா லக்‌ஷ்மி? என்பதே க்ளைமாக்ஸ்.

கேரக்டர்கள்…

நடனத்தில் ஜொலித்த பிரபுதேவா இதில் நடிப்பிலும் ஜொலிக்கிறார்.

இசையில்லாமல் ஒலிக்கும் அசையும் யாவும் வரிகளுக்கு நடன அமைப்பு அருமை. அந்த வரிகளுக்கு ஏற்ப பிரபுதேவாவும் குழந்தைகளும் ஆடுவது அற்புதம்.

இறுதிப் போட்டியில் இங்கே யார் தோற்றார்கள் என்பது இல்லை. நடனம் மட்டுமே ஜெயித்தது என்று சொல்லி அனைத்து நடன பிரியர்களையும் அழ வைத்துவிட்டார்.

தித்யா… நடனத்தில் நீ செம தில்-ய்யா… இந்த சிறுமியை குட்டி பிரபுதேவா என்று கூட சொல்லாம். இவரை சுற்றி திரியும் அந்த குண்டு பையனும் அர்ஜீனும் செம க்யூட். இவர்கள் செய்யும் குறும்பு ரசிக்க வைக்கிறது.

ஆனால் இந்த வயதிலேயே ஒரு பெண்னுக்காக அந்த பையன்கள் மாறி மாறி ஏதாவது செய்வது நெருடலாக உள்ளது.

படத்தில் யாருமே சிரிக்க கூடாது என டைரக்டர் விஜய் சொல்லிவிட்டாரோ? கோவை சரளாவை தவிர எல்லாரும் செம டென்சன் முகத்துடன் காணப்படுகிறார்கள்.

பிரபுதேவா, டான்ஸ் மாஸ்டர் சோபியா, கருணாகரன், ஐஸ்வர்யா ராஜேஷ், நடுவர், தித்யா என அனைவரது முகத்திலும் கொண்டாட்டமே இல்லை. இதனால் நமக்கே புன்னகை வர மறுக்கிறது.

ஐஸ்வர்யா ராஜேஷ் அமைதியாக வருகிறார். நடன மாஸ்டர் சோபியா அழகாக வருகிறார். அவ்வளவே.

தொழில்நுட்ப கலைஞர்கள்…

இந்த நடன படத்திற்கு சாம் சி.எஸ். இசை பக்க பலம். அதிரடி பாடல் முதல் இதமான இசை என வெளுத்து கட்டியிருக்கிறார்.

பின்னணி இசையிலும் கை கொடுத்துள்ளார்.

ஒளிப்பதிவும் எடிட்டிங்கும் கச்சிதம். இரண்டிலும் குறை சொல்ல முடியாது. ஆனால் ஓவராக எடிட்டிங் செய்துவிட்டாரோ? என்னவோ?

அல்லது படத்தில் டைரக்டர் விஜய் ப்ளாஷ்பேக் காட்சிகள் வைக்கவில்லையோ? பிரபுதேவா & ஐஸ்வர்யா காதலில் உணர்வும் இல்லை. அழுத்தமும் இல்லை.

டைரக்டர் விஜய் ஒரு நடன படத்தை கொடுக்க வேண்டும் நினைத்து அதில் ஸ்கோர் செய்துள்ளார். ஆனால் படம் முழுக்க நடனத்தையும் மையப்படுத்தியே காட்சிகள் அமைத்து விட்டதால் மற்ற காட்சிகளில் கவனம் கொள்ளவில்லை என்றே தோன்றுகிறது.

வெண்ணிலா கபடி குழு படத்தில் கபடி ஆட்டம், சென்னை 28 படத்தில் கிரிக்கெட் இருந்தாலும் மற்றவைக்கும் சுவாரஸ்யம் இருந்தது. ஆனால் இதில் அது இல்லை.

நிறைய டான்ஸ் ரியால்ட்டி ஷோக்களை ஒன்று சேர்த்து விட்டது போன்ற ஓர் உணர்வு ஏற்படுகிறது.

முக்கியமாக தித்யா மேடையில் நடனம் ஆடும்போது பயிற்சியாளர் பிரபுதேவா கீழே நின்று நடன அசைவுகளை சொல்லி கொடுக்கிறார். அது எப்படி சாத்தியம்?

ப்ரைட் ஆஃப் இந்தியா பட்டம் வெல்ல அப்படி ஒரு அனுமதி உண்டா? என்ன-? அது டைரக்டருக்கே வெளிச்சம்.

லக்‌ஷ்மி… நடன இளவரசி

Comments are closed.