தமிழ் சினிமா அப்டேட்ஸ் களை உடனுக்குடன் தெரிந்து கொள்ள Filmi Street App - ஐ டவுன்லோட் செய்யுங்கள்
பிச்சைக்காரன் முதல் பாகத்தில் ஒரு பணக்காரன் பிச்சைக்காரன் ஆக நடித்திருப்பார். பிச்சைக்காரன் 2 படத்தில் ஒரு பிச்சைக்காரன் ஒரு பணக்காரனாக நடித்திருக்கிறார்.
கதைக்களம்…
1 லட்சம் கோடிக்கு சொந்தக்காரராக இருக்கிறார் விஜய் குருமூர்த்தி. இவர் இந்தியாவின் 7வது பணக்காரன்.
இவரின் சொத்துக்களை அபகரிக்க விஜய் குருமூர்த்தி கம்பெனியின் CEO அரவிந்த் என்பவர் சதிதிட்டம் போடுகிறார்.
எனவே மூளை மாற்று அறுவை சிகிச்சையின் மூலம், வேறொருவரின் மூளையை விஜய் உடலில் பொருத்தி, தான் போடும் கட்டளைகளை கேட்பவராக மாற்ற அரவிந்த் முடிவு செய்கிறார்.
பிச்சைக்காரன் சத்யா என்பவனை தேர்ந்தெடுத்து அவருடைய மூளையை விஜய் குருமூர்த்தியின் உடலில் பொருத்துகிறார்.
அதன் பிறகு என்ன நடந்தது.? வில்லனின் சதி திட்டம் நிறைவேறியதா.? விஜய் ஆண்டனி என்ன செய்தார்? என்பதே படத்தின் மீதிக்கதை.
கேரக்டர்கள்…
‘பிச்சைக்காரன் 2’ படத்தை இயக்கி தயாரித்து இசையமைத்து எடிட்டிங் செய்து நடித்துள்ளார் விஜய் ஆண்டனி. இரண்டு கேரக்டர்கள் என வித்தியாசம் காட்டி தன்னுடைய பங்களிப்பு சிறப்பாகவே செய்துள்ளார்.
மேலும் ஒரு இயக்குனரின் முதல் படம் என்பது தெரியாத அளவிற்கு மேக்கிங்கில் சிறப்பு சேர்த்துள்ளார்.
தன்னுடைய பணியை சிறப்பாக செய்துள்ளார். முக்கியமாக இந்த படத்தில் நாயகியுடன் கொஞ்சம் கூடுதலாகவே ரொமான்ஸ் செய்து ரசிகர்களை கிளுகிளுப்பாக்கி உள்ளார் விஜய் ஆண்டனி.
காவ்யா தப்பார் ஓரிரு காட்சிகளில் வந்து கதையின் போக்குக்கு உதவியுள்ளார். யோகி பாபு நட்புக்காக நடித்திருப்பார் என்றே தெரிகிறது.
முதலமைச்சராக நடித்துள்ள ராதாரவி தன்னுடைய முதன்மை பணியை கச்சிதமாக முடித்துள்ளார்.
சிறுவன், சிறுமியாக நடித்த இருவரின் நடிப்பும் பிரமாதம்.
விஜய் சொத்துக்களுக்கு ஆசைப்படும் அவரது நண்பர்களாக தேவ் கில், ஜான் விஜய், ஹரிஷ் பெரடி ஆகியோர் நடித்துள்ளனர்.
டெக்னீஷியன்கள்…
பொதுவாகவே முதல் பாகம்.. இரண்டாம் பாகம் வந்தால் இரண்டு படங்களின் ஒப்பீடு அதிகமாகவே இருக்கும். முதல் பாகத்தில் அம்மா – மகன் சென்டிமென்ட் உணர்வுப்பூர்வமாக யதார்த்தமாக இருந்தது.
ஆனால் பிச்சைக்காரன் 2 படத்தில் அண்ணன் தங்கை சென்டிமென்ட் உள்ளது. முதல் பாகத்தை இருந்த அளவு இதில் இல்லை என்பதே உண்மை.
கோயில் சிலையே மற்றும் கல்லூறும் பூவே என்ற பாடல்கள் ரசிக்க வைக்கிறது.. பின்னணி இசை படத்திற்கு பலம்.
எடிட்டர் சில காட்சிகளை வெட்டி இருக்கலாம் என்றே தோன்றுகிறது.. (எடிட்டர் விஜய் ஆண்டனி).
ஒளிப்பதிவாளர் ஓம் நாராயணன் தன் பணியை சிறப்பாக செய்துள்ளார்.
பிச்சைக்காரன் விஜய் ஆண்டனிக்கு ஒரு பிளாஷ்பேக்.. பிச்சைக்காரர்களுக்கான புது வாழ்வு தரும் ‘ஆன்டி பிகிலி’ ஆகியவை சிறப்பு.
ஆனால் நட்பு, துரோகம், அரசியல் என கதைகள் வேறு பாதையில் பயணிப்பதால் சுவாரசியம் குறைகிறது.
ஆக பிச்சைக்காரன் 2.. பிச்சை போடலாம்
Pichaikkaran 2 movie review and rating in tamil